طريقة صنع البيتزا

البيتزا بتاعتى مش زى أى بيتزا ..تعالوا شوفوها واحكموا وطبعا بالخطوات والصور....

ازيكم يا بنات انا النهاردة كنت عاملة بيتزا على الغدا واخيرا صورتها علشان انزلهالكوا
وكان نفسى اوريهالكوا من زمان لانى كل اللى يدوق البيتزا عندى لازم يسالنى على مقاديرها وطريقتها
ندخل على العجينة
نصف كيلو دقيق
ربع كوب زيت
معلقة صغيرة بكنج باودر
معلقة كبيرة خميرة فورية
معلقة صغيرة ملح
معلقة كبيرة سكر
معلقتين كبار لبن بودرة
ماء دافى للعجن
معلقة كبيرة زيت ودى حنضيفها فى نهاية العجن
حنضيف كل المكونات على بعضها ما عدا الماء وبعدين نضيف الماء شوية شوية لغاية لما تتكون عجينة لا تلتصق
باليد وفى نفس الوقت مش يابسة نعجن فيها كويس اوى لمدة عشر دقايق ودى مهمة اوى لنجاح العجين وبعد كده حنضيف معلقة الزيت
ونعجن تانى خمس دقايق وده شكلها

ونسيبها تخمر لغاية لما يتضاعف حجمها بالشكل ده

بعد كده نبدا فى التشكيل انا عملت نوعين من البيتزا واحدة بالخضار والسوسيس وواحدة مشكل جبن وحشرح كل واحدة بالتفصيل
حنبدا بالبيتزا بالخضار والسوسيس
حنفرد العجين على الصينية زى ما انتوا شايفين على ضهرها مش جوه الصينية وطبعا قبل ما نحطها ندهن الصينية زيت خفيف

بعد كده بدهن العجين بالكاتشاب طعمه بيبقى جنان على البيتزا اكتر من صلصة البيتزا

بعد كده بحط رشه جبن موتزريلا قبل الخضار وديه مهمة جدا

بعد كده نرص الخضار المتقطع فوق الجبنة زيتون اسود واخضر ,بصل ,فلفل اخضر

بعد كده حنرش جبنة موتزريلا تانى ونحط السوسيس فوقه

بعد كده تدخل الفرن عالى الحرارة ونبقى مسخنينه قبلها بربع ساعة يعنى الفرن لازم يكون سخن جددددا ونولع من تحت ومن فوق فى نفس الوقت
وده شكلها فى النهاية شوفوا شكلها بيطلع حلو ازاى ومتساوى لما بتتعمل على الضهرلانها دايما تلزق فى الحواف لما تعمليها جواها

نيجى للبيتزا التانية مشكل جبن
طبعا حنفرد البيتزا وندهنها بالكاتشاب ونفرد عليها اى نوع جبن انت تحبيه انا بستخدم شيدر وموتزريلا ورومى بس كده
وومكن لو تحبى توزعى عليها سوسيس وممكن لا حسب زوقك ومفيش اى خضار عليها

ودى بعد ما استوت

ده طبق لكل فتوكة حترد وتقيم

نيجى بقى للمينى بيتزا انا كنت عملتها قبل كده فى عيد ميلاد بنتى وفى فتوكات طلبوها منى بالتفصيل
طبعا بنفس العجينة دى حنشكلها على الصاج دواير صغيرة وندهنها كاتشاب

بعد كده حنقطع فلفل وزيتون وبصل وسوسيس وممكن تونة كله قطع صغيرة ونخلطه بجبن موتزريلا مبشورة ورومى مبشورة
ونحط الحشوة على البيتزا ونسيبها تخمر ساعة وندخلها الفرن تستوى وده شكلها لما طلعت

[center]

وديه بيتزا بالبسطرمه والجبن

وده شكلها فى النهاية

[/center]

مشكور أخي الكريم

» كيفية صنع البيتزا
» كيفية صنع البيتزا
» طريقة العلاج من السحر